ဘော်စတွန်မှ အမှတ်တရ

ဘော်စတွန်မှ အမှတ်တရ

ကျွန်မရဲ့ ပထမဆုံး အမေရိကန်နိုင်ငံ ခရီးစဉ်၊ အနောက်နိုင်ငံကို ပထမဆုံး ခြေချခွင့်ရမယ့် ခရီးစဉ်လည်းဖြစ်တာကြောင့် ရင်ခုန်မှုတွေနှင့်အတူ လေယာဉ်ပေါ်သို့ လှမ်းလိုက်တယ်… ဂျပန်ကထွက်ခွာခရီးစဉ်မို့ အာရှသားခရီးသည်က အနောက်နိုင်ငံသားများထက်ပိုများနေသည်။ ပထမဆုံး မမေ့နိုင်တဲ့ အရာက လေယာဉ်ပေါ်က ဒူးရင်းသီးအနံ့ပါ။ (ကျွန်မအထင်တော့ ဒူးရင်းသီး မုန့်တစ်မျိုးဖြစ်မည်) အခြားခရီးသည်များ မည်သို့နေသည် မသိ ကျွန်မတော့ လေယာဉ်မထွက်ခင်ပင် အတော်ကို မူးနောက်သွားရပြီ။ ပထမဆုံးသတိထားမိလိုက်သည်က လူ့ကျင့်ဝတ်၊ မည်သည့်နေရာတွင် မည်သို့ပြုမှုနေထိုင်ရမည်ကို မသိသည်လား၊ ကိုယ့်ဘာသာ မုန့်စားတာ ဘာမှမဖြစ်ပါဟု ယူဆသည်လား မပြောတတ်ပါ။ အတော်ကိုဆိုးဝါးသော အနံ့က ဒူးရင်းသီးကြိုက်လှပါသည်ဆိုသော ကျွန်မဖို့ပင် ပိတ်လှောင်နေသော လေယာဉ်ထဲတွင် အတော်ကိုအနံ့ပြင်းနေပြီ။ အချိန်မိနစ်၂၀လောက်အတွင်းကို အနံ့က သက်သာသွားသဖြင့် တော်ပါသေးတယ်။ ဒီလိုနဲ့ ခရီးစဉ်တစ်လျှောက် အနားယူရင်း လိုက်ပါလာကာ ဘော်စတွန်မြို့သို့ရောက်ခဲ့ပါပြီ။

ဘော်စတွန်မြို့တွင် ကျွန်မနေခဲ့တဲ့ ပတ်ဝန်းကျင်က တိုက်တာ အဆောက်အဦးလည်း အရမ်းအမြင့်ကြီးတွေမဟုတ်ပါ။ အုတ်အကွက်လေးတွေပေါ်နေတဲ့ နီညိုရောင်တိုက်လေးတွေက အာရှသားကျွန်မအဖို့ အမြင်တမျိုးဖြင့် လှနေပါတယ်… မြို့ကြီးမဟုတ်သောကြောင့် သန့်ရှင်းမှု သပ်ရပ်မှုက တိုကျိုနဲ့ယှဉ်ကြည့်ရင်တော့ အကွာခြားကြီးကွာခြားနေလေရဲ့… အများသုံး လမ်းပန်းဆက်သွယ်ရေးကတော့ ကိုယ်ပိုင်ကားအသုံးများလှပါတယ်.. အများသုံးမြေအောက်ရထားတွေရှိပေမယ့် ကိုယ်ပိုင်ကားက ပိုပြီးအဆင်ပြေမည့်ပုံပေါ်ပါသည်။ တိုကျိုကဲ့သို့ ရထားချိန်လည်း မသိရ၊ ရထားလာတော့မည်လည်း မကြေငြာ၊ ရထားတွဲလဲမရှည်၊ ရထားဘူတာကလည်း ကျွန်မတွက်တော့ အမေရိကန်ရုပ်ရှင်ကားက လူကြမ်းတွေများ ကိုယ့်လာဖမ်းမလား ထင်ရပါသည်။ အကယ်လို့များ ဘော်စတွန်မှာ ကျွန်မနေခွင့်ရခဲ့မယ်ဆိုလျှင်ဖြင့်  ညဖက်တွေမှာ တစ်ယောက်တည်း အပြင်ထွက်ရဲ့ပါ့မလား။ လမ်းမီးများက မှိန်မှိန်လေးရယ်.. သူတို့တွက်တော့မသိ ကျွန်မတော့ တယောက်တည်းသာဆို ည ၉နာရီလောက်ဆိုအပြင်ထွက်ဖြစ်မည်မထင်။

Customer services အနေနဲ့တော့ နာမည်ကြီးလှတဲ့ ဂျပန်လိုနိုင်ငံမျိုးကို လားလားမှ မယှဉ်နိုင်ပါ။ လူမျိုး၊အသားရောင်မျိုးစုံဖြင့် လည်ပတ်နေတဲ့ ဘော်စတွန်မြို့လေးရဲ့ coustomer services က သဘောကျစရာမကောင်းလှပါ။ ကွန်ဖရင့်တက်စဉ် ကြုံတွေ့ရတဲ့ အတွေ့ကြုံနဲ့ ယှဉ်ရင် လူတန်းစားကွဲပြားမှုနဲ့အတူ လူတွေရဲ့ ဆက်ဆံမှု ယဉ်ကျေးမှု စသဖြင့် လူ့ကျင့်ဝတ်၊လူမှုဆက်ဆံရေးကွဲပြားမှုက ကျယ်ဝန်းလှသည်။ ဂျပန်မှာနေခဲ့ ဂျပန်ရဲ့ customer services ကိုတွေ့ကြုံခဲ့ရတဲ့ ကျွန်မတော့ ဂျပန်ကိုဘဲ သတိရနေမိတယ်။ သို့ပေမယ့်လည်း အင်္ဂလိပ်စကားပြောတိုင်းပြည်ဖြစ်သဖြင့် စကားပြောဆိုဆက်ဆံရေးမှာ အတားဆီးတစ်ခုတော့ မဖြစ်ခဲ့ပါ။ မသွားခင်က စိုးရိမ်မိတဲ့ အင်္ဂလိပ်စကား၊ အသံထွက်တွေလည်း ထင်သလောက်မခက်ခဲ၊ ကိုယ့်အသံထွက်ကို သူတို့ကောင်းကောင်းသဘောပေါက်သဖြင့် စိတ်ထဲတော့ ကြိတ်ပြီးဝမ်းသာမိသည်။

အစားအသောက်ကတော့ အနောက်နိုင်ငံတွေရဲ့ ထုံးစံအတိုင်း ပမာဏကများလှသည်။ ကျွန်မတော့ အမြဲတမ်းလိုလို ဆရာတစ်ယောက်နဲ့အတူ တစ်ဝက်ခွဲစားရသည်။ ဘယ်စားသောက်ဆိုင်မဆို (ကျွန်မရောက်ခဲ့သမျှ) အရင်ဆုံး ပေါင်မုန့်နှင့်ချိစ်လာချပေးသည်။ မြန်မာတယောက်အနေနဲ့ အဲ့ဒါတွေသာစားလိုက်လျှင်ဖြင့် တကယ်မှာထားသော ကိုယ်စားချင်သည့် အစားသောက်ကို စားနိုင်တော့မည်မထင်။ အနောက်နိုင်ငံလည်းဖြင့် ချိစ်နဲ့ပေါင်မုန့်ကို အဓိကထားစားတဲ့တိုင်းပြည်မို့လားမပြောတတ် ပေါင်မုန့်နဲ့ချိစ်က အတော်တော့စားကောင်းလှသည်။  လူတိုင်းလိုလို ၀ိုင် (သို့မဟုတ်) ဘီယာ (သို့မဟုတ်) ကော့ခ်တေး ကိုမှာသောက်လေ့ရှိကြသည်။ အချိုရည်မှာသောက်တာကို ကလေးအရွယ်မှလွဲပြီး သိပ်မတွေ့ရ။ နေ့လည်တွေမှာတော့  လူတိုင်းလိုလိုကော်ဖီခွက်လေးကိုင်ကာ လမ်းလျှောက်တာကို တွေ့ခြင်းဖြင့် ကော်ဖီအတော်ကြိုက်တဲ့ လူမျိုးလို့ ကျွန်မတော့ မှတ်ချက်ချမိသည်။ ဂျပန်မှာ အရက်ဘီယာအပြင် အချိုရည်သာသောက်များသော ကျွန်မ ဂတ်စ်အချိုရည်မတည့်သော ကျွန်မအတွက်တော့ ရေသန့်ဘဲအတိုးချသောက်ဖြစ်သည်။ ရောက်တုန်း သူတို့နည်းတူ ၀ိုင်လေးမှာသောက် ကော့ခ်တေးလေးမှာသောက်ကြည့်သည်။ ခေါင်းထဲမှာချာချာလည်လို့ အိပ်ငိုက်တာလား  မူးတာလားမခွဲတတ်တော့ သောက်ပြီးပြန်တာနှင့် ကျွန်မအိပ်ရပြီ။ ဒါပေမဲ့ စားသောက်ဆိုင်ထိုင်ချိန်တိုင်းတော့ သောက်ဖူးသည်ရှိအောင် သောက်ကြည့်လိုက်သည်။ နေ့တိုင်းလည်း ပြန်ရောက်တာနှင့် အိပ်ရသည်။

ကွန့်ဖရင့်တက်ချိန်မှာ ကျွန်မလေ့လာမိသလောက်တော့ ကျွန်မတို့ မြန်မာလူမျိုးတွေ အခွင့်ရေးသာရမယ်ဆိုရင် ကျွန်မတို့ဘာလို့ သူတို့တွေနှင့်မယှဉ်နိုင်ရမည်နည်း။ ကျွန်မတို့ အားလုံးမညံ့ကြပါ၊ လုပ်ခွင့်ရမည်၊ သင်ကြားခွင့်ရမည်၊ ကိုယ့်အရည်အချင်းကိုသာ ထုတ်ဖေါ်ခွင့်ရမည်ဆိုပါလျှင် သူတို့တွေလောက်တော့ မသာရင်တောင် နောက်မကျလှပါ။ ဒါပေမဲ့ ကျွန်မဘဲ မတွေ့မိတာလား။ ကွန်ဖရင့်လာတက်သောသူဘဲ နည်းတာလား မပြောတတ်ပါ။ မြန်မာပြည်ကနေလာတက်သည့် မြန်မာလူမျိုး၊ နိုင်ငံခြားတွင် ရောက်ရှိနေသော မြန်မာလူမျိုး သွားဆရာဝန်များလည်း အနည်းငယ်သာတွေ့မိသည်။ အခြားတိုင်းပြည်ကသူများ လာရောက်ပြီး လက်ရှိဘယ်ခေါင်းစဉ်က ခေတ်စားနေသည်၊ ဘယ်သုတေသနတွေကိုလုပ်ဆောင်နေသည်ကို လေ့လာကြ ဆွေးနွေးကြတာမြင်တော့ ကိုယ့်တိုင်းပြည်က သူတွေကိုလည်း သူတို့များတွေကို လာရောက်စေချင်မိသည်။ ကိုယ့်အစား ဆရာကြီးတွေသာဆိုရင် ကိုယ့်ထက်ပိုပြီး နောင်လာနောက်သားကို ပြန်လည်ဝေမျှနိုင်မည်လို့ ထင်မိသည်။ နောင်တစ်ချိန် ကျွန်မ နေရာတစ်ခုမှာ ခေါင်းဆောင်တစ်ယောက်ဖြစ်နေခဲ့ရင် ကွန်ဖရင့်တွေကို သွားတက်ဖို့ အငယ်တွေကို ကျွန်မတွန်းအားပေးမိမည်မှာ အမှန်ပင်။ အချိန်အတိုအတွင်းမှာ သူတို့တွေဘာလုပ်နေလဲ၊ လက်ရှိခေတ်စားနေသောသုတေသနနယ်ပယ်အကြောင်း၊ မတူညီသော အတွေးအမြင်များ အမေးဖြေကိုင်တွင်ဖြေရှင်းပုံ အချက်လက်တင်ပြပုံတွေနဲ့ တကယ်ကိုတန်ဖိုးရှိလှပါသည်။ ကျွန်မတော့ ပထမဆုံးခရီးစဉ်ဖြစ်သဖြင့် လေ့လာရေးခရီးစဉ်တွက်လည်း အချိန်ခွဲပေးခဲ့ရသေးသည်။ အာရှမှာပြုလုပ်သော ကွန်ဖရင့်များနှင့်ကွာခြားနေတာကတော့ မေးခွန်းအမေးဖြေများပင်ဖြစ်သည်။ အာရှနိုင်ငံသားများသည် မေးခွန်းမေးရမှာကိုတွန့်ဆုတ်တတ်သည်၊ ကိုယ်ပိုင်အမြင်ကို ပွင့်လင်းစွာမပြောဆိုရဲပေ။ ကျွန်မလည်း တစ်ယောက်အပါအ၀င်ပေါ့။ မတူညီသော အတွေးအခေါ် အတွေ့အကြုံတွေက တန်ဖိုးရှိလှသည်။ နောက်အခေါက်တွေလည်း သွားချင်ပါသေးသည်။ တစ်နေ့ခေါင်းဆောင်လုပ်မည်ဆိုလျှင် ကျွန်မအတွက် လေ့လာစရာတွေ အများကြီးလိုပါသေးည်။ ကျွန်မ ကြိုးစားရပါအုံးမည်လို့ မှတ်ချက်ချမိသည်။

မြို့တွင်းလည်ပတ်မှုကိုတော့ ခရီးစဉ်ရက်တိုသဖြင့် ကျွန်မ အဓိကသွားချင်သော နေရာတချို့မှလွဲပြီး သိပ်မရောက်ဖြစ်ခဲ့ပါ။ ဂျူနီယာညီမလေးတစ်ယောက်ရဲ့ ကျေးဇူးနဲ့ ကျွန်မ ဟားဗတ်မြို့ကို အပေါ်စီးကနေကြည့်ခွင့်ရခဲ့ပါသည်။ ရောက်ခဲ့သမျှအထဲက ကျွန်မ အကျေနပ်ဆုံးနဲ့ အပျော်ဆုံးကတော့ ဟားဗတ်တက္ကသိုလ်သို့ အလည်တစ်ခေါက်ရောက်ခဲ့ခြင်းပါ။ ကျွန်မရဲ့ အိပ်မက်တစ်ခုဖြစ်တဲ့ ဟားဗတ်တက္ကသိုလ်ကို ကျွန်မရောက်ခွင့်လေးတော့ ခဏရခဲ့တယ်. တက်ရောက်ခွင့်ကိုတော့ မကြိုးစားဘဲ ကျွန်မ မရောက်နိုင်ဖူးလေ.. ဒါပေမဲ့ အလည်တစ်ခေါက်တောင် ကျွန်မသိပ်ပျော်မိလျှင် နေ့စဉ်ခြေချခွင့်ရမယ့် ကျောင်းတောင်ကြီးရဲ့ အဖွဲ့ဝင်တယောက်အဖြစ်ဆို ကျွန်မ ဘယ်လောက်ပျော်မည်နည်း။ တစ်နေ့နေ့တော့ အဖွဲ့ဝင်တယောက်အဖြစ် ကျောင်းတော်ကြီးကို တစ်ခေါက်တစ်ခါ ရောက်ချင်သေးပါရဲ့။ အဖေနဲ့ အမေတွက် အမှတ်တရအဖြစ် ကျွန်မ အရမ်းနှစ်သက်တဲ့ အရမ်းတက်ချင်တဲ့ ကျောင်းရဲ့ တံဆိပ်လေးနဲ့အတူ ဖေဖေ မေမေဆိုတဲ့စာသားလေးပါတဲ့ မတ်ခွက်လေးနှစ်ခွက်ရယ်၊ ကျွန်မတွက် ကျောင်းတံဆိပ်ပုံ သံလိုက်ကပ်ခွာလေးရယ်ဝယ်ဖြစ်ခဲ့တယ်။ ခဏတာလေး ရောက်ခဲ့ရတဲ့ ဟားဗတ်တက္ကသိုလ်ကြီးရဲ့ မြင်ကွင်း ကျွန်မရဲ့ ခံစားလိုက်ရတဲ့ စိတ်လှုပ်ရှားမှုလေးကို ကျွန်မရဲ့ ဘော်စတွန်မြို့ ခရီးစဉ် အမှတ်တရလေးအဖြစ် နောက်တစ်ချိန်ပြန်ခြေချနိုင်မယ့် အချိန်ထိ ရင်ထဲသိမ်းထားလိုက်ပါတော့မည်။

အမှတ်တရစာစု

၁၇ မတ်လ ၂၀၁၅